2010 hi thenkhat chuan hamthatna leh malsawmna kan dawn kum a ni thei a, thenkhat ve thung chuan lusun mangan retheih leh thlabarna nasa tak kan tawh kum a ni thei a, thenkhat chuan, eng kum nge a nih pawh hre mang lo va zirlai leh sum leh hna buaipuia kan vir buai hlanin, December thla kan lo thleng reng a ni thei bawk. Ngaihzawng neih kum leh damlai lusun kum te pawh a ni ta ve ang! Engpawh ni se, vawi khat mah kan hmuh leh ngai tawh loh turin kum 2010 chuan mual a liam dawn ta. Thla hnuhnung ber kan paltlang mek lai hian, vawi khat chauh tal kum 2010 thlirletna hun insiam la, a hnuaia thute hi, nangmah inenfiah nan lo hmang ang che :
1. Kan vanneihzia hi :Sual bik vang ni maih lovin, leimin, tuilian, lirnghing, hrileng leh chhiatna hrang hrang avangin kum 2010-ah hian keini aia mi tangkai zawk leh mamawhtu ngah zawk mi tam takin mual an liam tih kan hria em? Kan aiah dam ta se he khawvel hian a chhawr zawk maithei asin. Kan vanneihzia inngaihtuahin, tangkai zawk leh hlu zawka dam chhung hun hmang turin inbuatsaih ang u.
2. Lungduh mual liam ta : 2010 chhung hian, i lungduhten mual an liamsan che em? Eng angin nge i hriat reng le? Anmahni i thlahlel tak tak anih chuan, media leh tarmawi vel hmanga hriatrengna atana insengso vak lovin, an nuna ze thate kha i nunah la chhawngin, i nun hmang ngeiin anmahni hriatrengna lantir zawk ang che.
3. Thian thar i nei em? : 2010 chhung hian hmelhriat thar, kumkhuaa thian ngheta vawn zui tur mi pakhat tal i neih belh em? Nge i thian neihsate nena in inzawmna i sat chat zawk? I mihringpuite zingah rinhlelh i neih belhchhah tam kum nge rin ngam i char thar tam kum? I sum neih belh zatin 2010 hlutna hi teh lo la, i thian tha neih belh zatin 2010 hlutna hi teh zawk ang che.
4. I hlu em? : 2010 chhung hian he planet tichereutu nge i nih he planet chereu tur vengtu? I lo pian ve avang hian he planet hian a chereu phah sawt nge tuihnang a ngah sawt? I dam rei zawh poh leh he planet tan phurrit i ni nge, i dam rei zawh poh leh he planet phurrit chhawk zangtu i ni zawk le?
5. Ngaihdam dil leh lawmthu hrilh : Pathianin kum khat a pek che chu i hmang zo titih ta. Tih luih leh tih sual palh vanga mi rilru tihnat i nei nual ngei ang. Kum a ral hmaa hun tlemte i la neih lai hian, ngaihdam dil tur i neih chuan ngaihdam i dil dawn lo’m ni? Mi duhsakna i dawng a, i tapchhakah “Lawmthu sawi ka ba nasa,” ti ringawtin kumin hi i hmang liam mai dawn em ni? An inah i pan thei lo anih pawhin, i bula phone kha hmang la, kum tawp hma ngei hian lawmthu sawi theihna hun i la nei asin.
6. Mi dangte leh nangmah : He kum khat chhung hian vawi engzat nge mi chaw i ei le? I ei zat chu i inah mitten an rawn ei ve em? Mi duhsakna i dawn nge tam ang mi duhsakna i hlan? 2010 chhung hian lamtang i ngah sawt nge hmelma i I ngah sawt? 2010-a i thil tawnte avang hian nangmah i inring ngam sawt nge i inringhlel sawt?
7. Malsawmna i ni em? : Mi tu emaw talin a dam chhunga nangmah a theihnghilh tawh ngai lohna tur thil tha pakhat tal, i mihringpui tu ber emaw chungah, kum 2010 chhung hian tih eng nge i neih le? A chhe zawnga hrerengtu che nge tam a tha zawnga hrerengtu che?
8. I hlawkpui em? : 2010 hi kum tangkaiah i hmang em? Zu nghei kum, zuk leh hmuam sim kum, mi rel bansan kum, insawizawi taihmak kum, nupa kar buai chinfel kum, leiba rulh zawh kum, intodelh tan kum, zirlai pass that kum, a ni em? He kum hi eng angin nge i hriat reng dawn le?
9. I tum i hlen em? : Mi pangngai i nih chuan, kumin kum tir lamah khan, kum 2010 chhunga hlen tur thil eng emaw intiam i nei ngei ang a. I tiam chu i hlen em? Hlen lo ta la i hlen loh chhan eng nge ni? Tun hi inenfiah hun a ni e.
10. Mahni inenfiah : He kum chhung hian nangmah i inhmu dik em? Khawtlang, kohhran thawhpuite leh midangte rilrua i dinhmun nia i inhriat dan chu i hre dik tial tial nge i hre dik lo tial tial? Nangmah i inhmuh fiah lehzual kum nge i inhmuh fiah loh lehzual kum?
11. Thiam thar i nei em? : 2010 chhung hian, thiam thar eng nge i neih? Zai, tuihleuh, two wheeler khalh, eisiam, computer, perek chhut, buh thlei, pangpar khawi…..eng emaw tal thiam thar i nei em?
12. Chhungkua : 2010 chhung hian chhungkaw hotu (i nih chuan) mawhphurhna i hlen nge hlen lo? Fa i nih chuan i nu leh pate leh unaute rilru i tihnat kum nge an lawm i hlawh kum?
13. I thih hun : 2010 kum tir ai chuan, kum khat ngawtin i thih hun tur a lo hnai ta. Kum tir ai khan kum tawpah hian, thi turin i inpeih zawk nge i inpeih lo ta zawk? I thlaphanna a zual zawk nge i thlamuang ta zawk?
(source – Lengzem)
No comments:
Post a Comment